المشهد الحادي عشر

المشهد الحادي عشر
(الأهالي يتجمعون في شارع اللبنانيين مع مصوري الصحف والتلفزيون)
رامز
أَنَا قِلْتْ بَدِّكْ تِنْتِخْبِيهْ .. يِعْنِي بَدِّكْ تِنْتِخْبِيهْ..
حسنة
غَيْرْ طَنُّوسْ مَا بِنْتِخِبْ.. هَيْدَا قَرَارِي وْمَا بِتْرَاجَعْ عَنُّو..
رامز
رَاجِي زَلْمِي آدْمِي.. صَرْلُو بْهَالِبْلاَدْ عِشْرِينْ سِنِه .. وْبَعْدَا حَالْتُو مِتِلْ حَالِتْنَا..
حسنة
وْمِينْ قَلَّكْ أَنَا رَاضْيِه بْهَالْحَالِه.. سِدَّيْتْ بُوزِي سْنِينْ حَلِّي بَقَى إِنِفْجِرْ..
رامز
هَلَّقْ بَعِدْ مَا كِبْرُوا وْلاَدْنَا وِتْجَوّزُوا.. عَمْ تِحْكِي هَالْحَكِي؟
حسنة
كِنْتْ غَشِيمِه .. غَشِيمِه كْتِيرْ
BUT NOT ANY MORE
رامز
مِنْ يَوْمْ مَا نِزْلِتْ صُورْتِكْ بِالْجَرِيدِه.. وْإِنْتِي عَمْ تِتْغَيّرِي..
حسنة
أَللـه يِحْمِي طَنُّوسْ .. نَزَّلْلِّي صُورْتِي مَعْ رئيس وزراء أستراليا.. هَزِّتْ الشَّارِعْ كِلُّو..
رامز
وَاللّـه فِي نَاسْ كتير عَم بِتْرَكِّعُنْ الصُّوَرْ.. يَا أَصْحَابْ الْجَرَايِدْ لا بَقَى تِنْشْرُوا صُوَرْ.. رَحْ تِخْتِرِبْ بْيُوتْنَا..
حسنة
إِنْتْ مَحْسُودْ مِنِّي .. وْحَسَدَكْ رَحْ يِقِتْلَكْ..
رامز
نْسيتي لمِّنْ سَرْقُونا حَدّ بيتنا، وْرحْتي تنامي عند بِنْتِك من كتْر الْفَزَعْ؟.. نْسِيتِي لِمِّنْ كِنْتِي تْقُولِي: أَللـه يْطَوِّلْ بْعِمْرَكْ يَا رِجَّالْ؟
حسنة
وْبَدَلْ مَا يْطَوِّلْ بْعُمْرَكْ.. قَامْ طَوَّلْ لْسَانَكْ
أم كلاكيش
أَللـه مَعْكُنْ يَا جَمَاعَه.. شُو بُو صَوْتْكُنْ طَالِعْ؟
حسنة
كِنْتْ عَمْ غَنّجو شْوَي.. جَوزِي بِيحِبّ الْغِنْجْ كْتِيرْ..
أم كلاكيش
بَعِدْ نِصّ سَاعَه.. رَحْ يِنْتِلِي الشَّارِعْ.. جَايِي التلفِزْيُونْ والْجَرَايِدْ والإِذَاعَاتْ..
حسنة
التِّلْفِزْيُون وِالْجَرَايِدْ.. يِعْنِي فِي أَخِدْ صُورْ.. عْطُونِي نِمْرِة الهيردريسّا.. حَدَا بْيَعْرِفْ نِمْرِة الهِيرْدْرِيسّا... أَكِيدْ فِي طَاوْلِة شَرَفْ..
عزيزة
طاوْلِةْ شَرَفْ.. وْمَا حَدَا قَللِّي.. شُو نِسِي الِمْعَلِّمْ طَنُّوسْ إِنِّي عَمّة الأرملِه اللّي ابْتَلْيِتْ بِالْمَرْحُوم إِبْنُو..
حسنة
إِذَا كِنْتي عمّة كنتُو.. أَنَا رَئِيسِةْ إِتِّحَادْ.. وْمَا بْتِلْبَقْ طَاوِلْةْ الشَّرَفْ إِلاَّ لْمَحْسُوبِتْكُنْ..
عزيزة
عَرِّمْ يَا جُوخْ عَرِّمْ.. طَاوْلاَتْ الشَّرَفْ مَرْبَطْ خَيِلْنَا..
حسنة
بْعِرْسْ بِنْتِي كَانْ فِي طَاوْلِة شَرَفْ.. وِحْيَاتْكُنْ خِلّيْتْهَا تِضْوِي.. وْصَارُوا النَّاسْ يْقُولُوا: إِنْتِي أَحْلَى مْنِ اللَّيْدِي دَيَانَا..
أبو قشّه
سْأَلُوا مْجَرِّبْ وْلاَ تِسْأَلُوا حَكِيمْ.. مَرَّه قَعْدْتْ عَ طَاوِلْةِ الشَّرَفْ.. وِانْحَشَرْ مَعِي الدَّقّ .. وْصَارْ وَيْلِي انْ مَا رِحِتْ عَ الحمّامْ.. وْوَيْلِي قُومْ عَنِ الطَّاوْلِه..
رامز
الْعَمَى.. إِجْتَكْ بْوَقْتِ الْحَشْرَه.. وْكِيفْ حِلَّيْتْ الْمَسْأَلِه؟
أبو قشّه
ضِلَّيْتْ قَاعِدْ.. وِاللِّي بَدُّو يْصِيرْ يْصِيرْ.. فِي عِنْدِي غسّالِه بِتْلَقِّطْ حَفْرَاتْ الْمَوْتْ..
عزيزة
طَاوِلْةْ الشَّرَفْ لِهَا شْرُوطْ.. إِذَا بِدَّكْ تِقْعُدْ عْلَيْهَا.. لازِمْ تْضَلّ فَاتِحْ تِمَّكْ وْعَمْ تِضْحَكْ.. لأنْ مَا بْتَعْرِفْ أَيْمَتَى بْيَاخْدُولَكْ صُورَه..
حسنة
صُورَه.. صُورَه.. مُشْ عَمْ لاَقِي نِمْرِةْ الْهِيرْدْرَاسّا.. حَدَا يِعْطِينِي نِمْرِة الهِيردْرَاسّا..
عزيزة
(تهمس بأذن أم كلاكيش)
جَوْزَا بْيِشْتِغِلْ مِنْ مَيْلْ.. وِالْهِيرْدْرَاسَّا بْيِقْبِضْ مِنْ مَيْلْ ..
أم كلاكيش
يَا حَرَامْ عَ جَوْزَا جَيْبِتُو مَبْخُوشِه.. كِلّ مِصْرِيَّاتُو رَايْحَه عَ الِفْسَاتِينْ.. مْبَارِحْ شِفْتَا مَعْ رَئِيسْ تَحْرِيرْ جَرِيدِة الشَّمْسْ..
عزيزة
مع مين؟ مع رستم؟ وْمَا سْأَلْتِيهَا شُو عَمْ تِعْمِلْ مَعُو..؟
أم كلاكيش
سْأَلْتَا.. سْأَلْتَا.. قَالْ حَبّ يِعْمِلْ مَعَا حَدِيثْ.. بَسّ نِسِي قَلَمُو بِالْمَكْتَبْ..
عزيزة
(بصوت منخفض)
واللـه لَـ إِقبرَكْ يا رستُم
(تكمل بصوت عالٍ)
لَيْش مِينْ عَم يِقْرا جَرايِد بْهالأيّام؟ كِلُّنْ عَمّ يِتْفَرّجُوا عَ الصّوَر.. جَارْنَا بُو خَلِيلْ بْيِمْسُكْ الْجَرِيدِه بِالْقِلْبْ.. وْإِذَا شَافْ سِيَّارَه مَقْلُوبِه عَ ضَهْرَا .. بِيقُولْ: يَا حَرَامْ .. قَوِلْكُنْ حَدَا مَاتْ بْهَالْحَادِثْ..
أم كلاكيش
أَنَا مَا بِشِتْرِي الْجَرِيدِه.. إِلاَّ إِذَا كَاتْبِينْ عَنِّي شِي..
حسنة
إِي بْحَيَاتِكْ مَا انْكَتَبْ عَنِّكْ بِالْجَرِيدِه.. حَاجِي بَقَى تْفَنّصِي عْلَيْنَا.. الجمْعَه الماضْيِه كانِت صُورتي مْعِبّايِه الصّفْحَه
أم كلاكيش
أَنَا قِلْتْ إِذَا كَاتْبِينْ عَنِّي.. وِلْهَالسَّبَبْ مُشْ عَمْ إِشْتْرِي جَرَايِدْ.. فْهِمْتِي..
عزيزة
جَرَايِدْنَا خَزِّقْ لَزِّقْ.. وْعَرِّمْ بِالْحَفْلاتْ..
حسنة
كَتِّرْ خَيْرْ هَالْجَرَايِدْ.. كَتِّرْ خَيْرْ هَالإِذَاعَاتْ .. كَتِّرْ خَيْرْ هَالتِّلْفِزْيُون.. بالْقَلِيلِه عَمْ بِيسَلُّونَا بْهَالْغِرْبِه.. خَرِجْنَا بَسّ نِنْتِقِدْ.. وْوَقْتِ الشِّغِلْ مَا بْيِطْلَعْ مِنَّا شي..
أم كلاكيش
بْهَالْجَالْيِه فِي هَسْتِيرْيَا مُصَوَّرَه.. كِلُّنْ عَمْ يِرِكْضُوا وَرَا الصُّورَه..
حسنة
عَمْ بِتْقُولِي صُورَه.. رَحْ يُوصَلُوا الِمْصَوّرِينْ وْبَعْدِي مَا لْقِيتْ نِمْرِةْ الْهِيردراسّا..
جبور
حَدَا يِفْتَح الرَّادْيُو.. الِمْعَلِّمْ طَنُّوسْ عَ الْهَوَا..
أم كلاكيش
مَا سْمِعْتُو شُو عَمْ بِيقُولْ؟!.. وَلَوْ كِنْتْ سْمَعْلَكْ كِلْمِه..
جبور
عَمْ بِيقولْ للنَّاسْ تَا يِتْجَمّعُوا هَونْ.. بْشَارِعْ اللّبْنَانِييّنْ..
أم كلاكيش
يا مِيةْ أَهْلا وْسَهلا.. نِحْنا ناطْرينُو
حسنة
أَكِيدْ بَدُّو يِجِي عَالَـمْ أَللـه .. طَنُّوسْ إِبِنَّا وْلازِمْ نْشَجْعُو..
رامز
وْرَاجِي إِبِنَّا.. لَيْشْ مَا مِنْشَجْعُو كَمَانْ..
حسنة
رَاجِي مَا مَعُو يَاكُلْ.. وِالنَّاسْ جُوعَانِه بَدّا مِينْ يْطَعْمِيهَا..
رامز
نِحْنَا بْأُسْتْرَالْيَا.. وْمَا حَدَا جُوعَانْ.. الدَّوْلِه بْتِدْفَعْ مِنْ مَيْلْ.. وْمِنْدَبِّرْ حَالْنَا مِنْ مَيْلْ تَانِي..
رامز
هَيْدِي مَعْرَكِه بَيْنِ الْغَنِي وِالْفَقِيرْ.. وَعَ طُولْ الْغَنِي بْيِرْبَحْ..
حسنة
وْلا رامِزْ.. قبل ما إتْجَوّزَكْ ليش ما قِلْتِلِّي إِنَّك تابِعْ ماوْتسي تونغ؟
رامز
يَا دِلُّو الْمَا بْيِرْبَحْ آخِرْتُو.. كِلْ شِي بْهَالدِّنِي فَانِي.. وْمَا بِيصِحّ إِلاَّ الصَّحِيحْ..
عزيزة
كِلْ شِي عَمْ بيصِحّ.. إِلاَّ الصَّحِيحْ.. وْمَا حَدَا مِنَّا عَمْ بِيفَكِّرْ بْآخِرْتُو.. خِدُوا مَثَلاً بِيَّاعْ الدَّرَا .. كَانْ مَاشِي بْتَقْوَى أَللـه وْعَمْ بِيبيِع دَرَا.. فَجْأَه صارْ متل كلب السّلاقي.. عَمْ بِيشَمْشِمْ أَخْبارْ تا يِسْلِقَا مع دْراياتُو
جبور
بَعِدْ خَمْسِ دْقَايِقْ رَحْ يِبْتِدِي الْمِهْرِجَانْ.. مَا حَدَا بْيَعْرِفْ يِمْكِنْ نِطْلَعْ بْشِي صُورَه..
حسنة
شُو عَمْ بِتْقُولْ.. صُورَه.. وَيْنِ الصُّورَه؟.. بَدِّي إِطْلَعْ بِالصُّورَه..
ـ1ـ
يَا مِينْ يْحِنّ عْلَيّي
وِيْصَوِّرْنِي بْهَالْبُوزَاتْ
تَا خَبِّيه بْعِينَيِّي
وْقِلُّو يَا إِبْنِ الذَّوَاتْ
ـ2ـ
بِالْجَرِيدِه بْحَرْفِ كْبِيرْ
يِكْتُبْ إِسْمِي كْبِيرْ كْتِيرْ
تَحْتِ الصُّورَه الْعَمْ بِتْضَوِّي
الأَحْلَى مِنْهَا مَا بِيصِيرْ
ـ3ـ
جَوْزِي يِتْشَكَّى لإِمُّو
وْإِمّو تْخَفِّفْلُو هَمُّو
لا فِهْمُوا عْلَيِّي وْلاَ شِي
أَتْقَلْ مِنْ دَمَّا دَمُّو
ـ4ـ
الْمَا بْيِتْصَوَّرْ.. يَا دِلُّو
مْنِ الصَّعْبِ النَّاس تْجِلُّو
بْيِزْوِي بِالأُوضَه عَ طُولْ
وِجُّو أَسْوَدْ عَ حِلُّو
(صوت أزلام طنوس بيك)
يوسف
طَنُّوسْ بَيْكْ مِنْ لُبْنَانْ
رَافِعْ رَاسْنَا وَيْنْ مَا كَانْ
عدنان
طَنُّوسْ بَيْكْ نِيَّالَكْ
عَمْ يِرْقُصْ أَرْز جْبَالَكْ
يوسف
يَا طَنُّوسْ يَا إِبْنِ الأَرْزْ
رَجِّعْنَا عَ بْلاَدْ الْعِزّ
عدنان
مِنْحِبَّكْ يَا طَنُّوسْ بَيْكْ
الشَّمْسْ بْتِشْرُقْ مِنْ عِينَيْكْ
يوسف
طَنُّوسْ بَيْكْ بْغِرْبِتْنَا
بَدُّو يِحْمِي عَيْلِتْنَا
حسنة
(تدخل في الهوبرة)
يَا طَنُّوسْ يَا عَالِي الرَّاسْ
وِجَّكْ بِالصُّورَه بْيِنْبَاسْ
يوسف
اللَّحْظَه اللِّي إِنْتُو نَاطْرِينَا قَرّبِتْ.. النَّصْرْ اللُّبْنَانِي بْأُسْتْرَالْيَا قَرَّبْ.. زَقْفِه كْبِيرِه لِلنَّصْرْ..
الإِنْسَانْ اللِّي حِبَّيْتُو وْجِيتُو تَا تِسْمَعُو كْلاَمُو.. رَحْ يْطِلّ عْلَيْكُنْ.. خَلُّوا زْلاَغِيطْكُنْ تُوصَلْ لِلسَّمَا.. سَيِّدَاتِي، آنِسَاتِي، سَادَتِي، أَتْرُكُكُمْ الآنْ مَعَ حَبِيبِكُمْ، مَعَ حَبِيبِ الشَّعْبْ، مَعَ إِبِنْ لُبْنَانْ.. الْمُعَلِّمْ طَنُّوسْ..
(تصفيق حاد)
طنوس
خَفّفُوا زْقِيفْكُنْ .. تَا تِسْمَعُونِي.. يَا شَعِبْ لُبْنَانْ الْبَطَلْ.. يَا حَفِيدْ الأَرْزْ.. يَا إِبِنْ صِنِّينْ.. لا للإِجْرَامْ.. لا لِلْبِطَالَه.. لا لِلْمُخَدَّرَاتْ..
(يطل بائع الذرة)
بائع الذرة
عَ الدَّرَا.. الدَّرَا.. عَ الدَّرَا..
طنوس
مُشْ وَقْتَكْ يَا بِيَّاعْ الدَّرَا..
بائع الذرة
هَلَّقْ وَقْتِي.. صَرْلِي زْمَانْ نَاطِرْ هَالْيَوْمْ..
طنوس
شُو بَدَّكْ مِنِّي؟
بائع الذرة
بَدِّي يَاكْ تْقُولْ الْحَقِيقَه.. مِينْ سَرَقْ بْيُوتْ النَّاسْ؟.. مِينْ عَمْ بِيتَاجِرْ بِالْحَشِيشِه؟.. مِينْ قَتَلْ إِبْنَكْ؟..
طنوس
يَا رْجَالْ .. خِدُو مِنْ هَوْنْ .. رَيّحُونِي مِنُّو..
بائع الذرة
جَايِي تَا رَيِّحْ النَّاسْ مِنَّكْ.. قِرّ وَلاَّ بِقِتْلَكْ..
طنوس
يَا رْجَالْ.. خَلّصُونِي مِنّو
(يحاول أزلام طنوس أن يشهروا أسلحتهم، يسبقهم إلى ذلك أبو قشّة وأم كلاكيش)
أبو قشّه وأم كلاكيش
ما حَدا يِتْحرك.. سلّموا سلاحكن أحسنلكُنْ
الجمهور
بو قشه وأم كلاكيش.. مُش مَعْقُول؟!
أم كلاكيش
قلتِلّكُنْ.. ما حَدَا يِتْحَرَّكْ
(أزلام طنوس بيك يرمون أسلحتهم على الارض)
بائع الذرة
رْجَالَكْ سلّموا سْلاحُنْ.. قِرّ قبلْ ما فَرّغْ فَرْدي بْراسَكْ.. وَاحِدْ.. تْنَيْنْ..
(ينهار طنوس)
طنوس
سَامْحُونِي دَخِيلْكُنْ.. أَنَا اللّي سْرَقْتْ بْيُوتْكُنْ.. أَنَا الْعَمْ هَرِّبْ حَشِيشِه.. أَنَا اللِّي قْتَلْتْ إِبْنِي..
(تطل أم يوسف من بين الجمهور وبيدها مسدس)
أم يوسف
إِنْت ما قتلت إبنك بَسّ.. إنْت قْتَلْتني أَنا كَمانْ لِمِّن سرقت ولادي منّي وْمِشَّيْتُنْ عَ دْرُوب الْخَطِيِّه.. هَيْدي رْصَاصِةْ بْقَلْبَكْ مِنْ كلّ أم حْرَقْت قَلْبَا..
(تحاول أن تطلق النار، طنوس يقف أمامها)
طنوس
عْطِينِي فَرْدِك يا أم يوسف..
أم يوسف
إِذَا بِتْحِبّ أَللَّه تْرِكْنِي آخُد بْتَارِي.. وْتارْ هَالإمّاتْ الْعَمْ تِبْكِي مِتْلِي..
طنّوس
نِحْنا بْأسْترالْيا يا أمّ يوسِف.. هَوْن الْعَدالِه بْتاخُدْ مَجْرَاها..
(أم يوسف تسلمه مسدسها، يلتفت إلى طنوس)
فِيكْ تْضَلّ سَاكِتْ تَا كِنْتْ تْوَكِّلْ مُحَامِي.. يَا شَعِبْ لُبْنَانْ الْبَطَلْ.. قَبِلْ مَا تِرْجَعُوا عَ بْيُوتْكُنْ..
لازِمْ تْدُوقُوا دْراياتِي.. عَ الدَّرا الدَّرَا.. عَ الدَّرا..
انتهت