المشهدان التاسع والعاشر

المشهد التاسع
"رامز وزوجته حسنة عائدان إلى بيتهما بعد انتهاء العرس"
رامز
عِجْبِكْ شُو هَالْمَسْخَرَه.. كَانْ فَرَطْ الْعِرْسْ عَ دَقْرَه زْغِيرِه..
حسنة
لَوْلا الأَبُونَا.. كَانُوا شَرْشَحُونَا..
رامز
قَلِيلِه السِتّ عَزِيزِه.. فَتْحِتْ مَشْكَلْ لا عَ الْبَالْ وْلاَ عَ الْخَاطِرْ.. شُو بَدَّا دَخْلِكْ بْهَالْحَكِي الْمَا لُو طَعْمِه..
حسنة
َبدْرِ السَّمَا إِنْتِي وْغَيْرِكْ صْرَامِه.. هَيْدَا شِعِرْ هَيْدَا.. هَلّلي بْيِعْمِلْ النَّاسْ صْرَامِه شُو بِيكونْ..
رامز
شُو بِيعَرِّفْنِي.. النَّاسْ بْهالايام ما بِتْفَتِّشْ إلاّ عن الْمشاكلْ
"يوسف وأخوه عدنان مقنعان، يعترضان طريقهما"
يوسف
DON'T MOVE.. RAISE YOUR HANDS
عدنان
GIVE US YOUR MONEY OR WE'LL KILL YOU
"حسنة تحاول أن تخفي جواهرها"
يوسف
GIVE US YOUR JEWELLERY.. YOUR WATCH.. HURRY UP
"يوسف وعدنان يهربان صوب بيتهما"
حسنة
عَجِّلْ اتِّصِلْ بِالْبُولِيسْ.. وْخِدْنِي نَامْ عِنْدْ بِنْتِي.. ما بَقَى بَدِّي عِيشْ بْهَالشّارِع.. بِيع الْبَيت وْأَللّـه يِتْحَنَّنْلُنْ فيه..
رامز
فيقوا ياجيران.. الحراميي سرْقُونا
"يتراكض أهل الحي"
أم يوسف
"تحاكي نفسها"
أللـه يستر ما يكونوا ولادي.. بس ولادي نايمين..
أم كلاكيش
شِفتِي شُو صَابُو رامز وْمَرْتُو.. كَانُوا دَبْحُوهُنْ الزِّعْرَانْ.. شلّحوهُن بْنصّ دين الشَّارِع.. الْعَمَى شُو مِجِرْمِينْ..
أم يوسف
"تجفل لدى سماع صوت أم كلاكيش"
شو عَمْ بِتْقُولي.. كنْت شارْدِه شْوَيّ؟
أم كلاكيش
حِبَّيْت إِسْكُنْ بْهالشَّارِع مَعْ خَيِّي بِيَّاعْ الدَّرَا وإبنْ عمي الشاعر بو قشّه لأَنُّو كِلُّو لِبْنَانِيّينْ.. وْمَعْ هَيْدَا وْكِلّو شوفي شو عَمْ بيصِيرْ.. قَوْلِكْ مِين عَمْ يِعْمِلْ فِينا هَيْك؟
أم يوسف
إي صحيح.. مين عم يِعمل فينا هَيْك؟
عليا
لاَزِمْ بِيعْ بَيْتِي.. وْإِنْقُلْ مِنْ هَالشَّارِع.. الْجَرِيمِه عَمْ تِكْتَرْ.. وْحَالِتْنَا صَارِتْ صَعْبِه..
"يدخل جبور"
جبور
انشّاللـه بِيكُونْ فِدَا عَنْكُنْ يَا جَمَاعَه.. قَتْلُوا بُو الْيَاسْ..
عليا
بُو الْيَاسْ مَا غَيْرُو.. الزَّلْمِي الْقَدِّيسْ الِمْعَتَّرْ.. اللّي بِيسَاعِدْ مِينْ مَا كَانْ بْهَالشَّارِعْ..
أم يوسف
"تحاكي نفسها مجدداً"
نشكرالله اللي شفْت بْعِينَيِّي إِنّو وْلادي نايمين بالبيت..
جبور
قَتْلُوهْ كِرْمَالْ خَمْسِينْ سَنْسْ.. افْتَكْرُوا مَعُو مَصَارِي.. وْلِمِّنْ مَا لَقْيُوا مَعُو شِي إِخْدُوا رُوحُو..
عليا
كِلّ يَوْمْ فِي جَرِيمِه جْدِيدِه.. بْهَالشَّارِعْ مَا بَقَى يِنْعَاشْ.. لاَزِمْ نِنْقُلْ عَ شَارِعْ جْدِيدْ..
جبور
انْطِرُوا تَا نْبِيعْ بْيُوتْنَا بِالأَوَّلْ.. شُو مِفْتِكْرِينْ النَّقْلِه هَيّنِه..
عليا
لْعِمْرُنْ مَا يِنْبَاعُوا.. وَاحِدْنَا لازِمْ يْخَلِّصْ حَالُو بَسّ.. أَنَا شُو بَدِّي بِالْبَيْتْ إِذَا بِيمُوتْ وَلَدْ مْنِ وْلاَدِي..
"يدخل رستم مسرعاً"
رستم
قُولُوا أَللـه يَا جَمَاعَه.. إِبِنْ طَنُّوسْ التِّنِكْلِيزِي مَاتْ..
أم كلاكيش
ما هلّق كنّا بعرسو؟
رستم
تْجَوَّزْ وِتْجَنَّزْ..
أم يوسف
إِبِنْ طَنُّوسْ اللِّي مْقَدَّمْ عَ النِّيَابِه مَاتْ.. وْمِينْ قَتْلُو؟
رستم
هُوِّي قَتَلْ حَالُو.. إِخِدْ إِبْرِه عْيَارَا قَوِي..ما فينا نْقُول إلآّ أَللـه يِرْحَمُو..
جبور
يَا حَرَامْ عَ طَنُّوسْ.. مَا كَانِتْ لاَزْمِتْلُو هَالِمْصِيبِه قَبْلِ الإِنْتِخَابَاتْ..
أم كلاكيش
لازِمْ نِهْرُبْ مِنْ هَالشَّارِعْ.. وْمَا لاَزِمْ نِتْأَخَّرْ دْقِيقَه وِحْدِه..
"تغني على لحن عندي سمكة"
ـ1ـ
لا تِضْحَكُوا عْلَيّي
مَا بْتِغْفَى عِينَيِّي
يَوْمِيِّه فِي خَلْع وْضَرْبْ
وِمْشَاكِلْ.. يَا مَحْلَى الْحَرْبْ
شَارِعْنَا يَا رَبِّي يَا رَبِّي
كِلُّو لِبْنَانِيّي
ـ2ـ
مْبَارِحْ سَرْقُوا جَارِتْنَا
وْقَتْلُوا شَبّ بْحَارِتْنَا
وْخَوَّفُوا كِلّ الْجِيرَانْ
وْبَكُّوا بْنَيَّاتْ وْصِبْيَانْ
وْصَارِتْ صَارِتْ سَاحِتْنَا
بِتْعَتِّمْ لَيْلِيِّه
ـ3ـ
سَاعِدْنِي يَا رَبِّي
إِتْغَلَّبْ عَ الْغِرْبِه
تَا قَدِّمْلَكْ عُمْرِي
تَا حَوِّشْلَكْ زَهْرِي
وْخَبِّيكْ جُوَّا قَلْبِي
وْإِفْرِشْلَكْ إِيدَيِّي
**
المشهد العاشر
(أزلام طنوس بيك)
يوسف
الِمْعَلِّمْ طَنُّوسْ زِعْلاَنْ كْتِيرْ.. كِلّ النَّاسْ عَمْ يِتِرْكُوا الشَّارِعْ.. شَعْبِيتُو عَمّْ بِتْخِفّ..
عدنان
وَاللـه مَعَكْ حَقّ.. مَاتْ إِبْنُو وْمَا زِعِلْ هَالْقَدّْ..
يوسف
بْتَعْرِفْ لَيْشْ لأَنُّو مِتِّكِلْ عَ اللِّبْنَانِيِّي تَا يِنْجَحْ.. مَا لاَزِمْ نِتْرِكُنْ يْفِلُّوا
(أبو قشّه يحمل حقيبة السفر)
هَايْ .. إِنْتْ.. لْوَيْنْ حَامِلْ شَنِطْتَكْ وْرَايِحْ..
أبو قشّه
مِي .. نُو سْبِيكْ إِنْجْلِيشْ..
عدنان
لَيْشْ مِينْ عَمْ بِحَكِّيكْ إِنْجْليشْ.. مُشْ سَامْعُو عَمْ بِيقِلَّكْ: لْوَيْنْ رَايِحْ؟
أبو قشّه
وَاتْ.. وَاتْ .. وَاتْ دِيدْ يُو سَايْ..
يوسف
وَطْوَطْ رَقِبْتَكْ انْشَاللّه.. جَاوِبْنِي أَحْسَنْ مَا هِفَّكْ.. لْوَيْنْ رَايِحْ؟
أبو قشّه
مِي مِي مِي مِي مِي مِي.. فِتّ وْكُولْ..
يوسف
فِتّ وْكُولْ.. شُو هَايْ إِسِمْ مَنْطْقَه.. أَنَا مُشْ سَامِعْ فِيهَا..
أبو قشّه
رَاسُو أَسْوِدْ.. عْيُونُو كْبَارْ.. وِقِفْ بْوِجِّي وْصَاحْ: عَ الدَّرَا الدَّرَا عَ الدَّرَا..
عدنان
هَيْئِتُو مَجْنُونْ .. تْرِكُو يْحِلّ عَنّا..
يوسف
قَبِلْ مَا إِتِرْكُوا لازِمْ إِسْأَلُو مِينْ بَدُّو يِنْتِخَبْ..
أبو قشّه
طَنُّوسْ التِّنِكْلِيزِي..
يوسف
إِسْمُو الِمْعَلِّمْ طَنُّوسْ.. فْهِمِتْ
أبو قشّه
وْبَدِّي غَنِّيلُو كَمَانْ:
طَنُّوسْ التِّنِكْلِيزِي
صَارْ يَعْرِفْ إِنِكْلِيزِي
كَانْ يْفَكِّرْهَا صَعْبِه
طِلْعِتْلُو فَاري إِيزِي
عدنان
قِلّتِلَّكْ كَحّشُو.. بَلّشِتْ عِقْدِةْ لْسَانُو تِنْفَكّْ..
أبو قشّه
شُو قِلتْ.. عَيْبْ عْلَيْكْ تْقُولْ هَالْكِلْمِه..
عدنان
فْرِقْنَا بَقَى.. الْعَمَى شُو هَالِمْصِيبِه..
أبو قشّه
يَا طَنُّوسْ يَا طَنُّوسْ
مِينْ اللِّي قَلَّكْ مَنْحُوسْ
يوسف
هَيِئْتَكْ مُشْ رَاضِيهَا زْغِيرِه.. حْمَالْ شَنِطْتَكْ وْفِلّْ مِنْ هَوْنْ..
"صوت بائع الذرة "
عَ الدَّرَا الدَّرَا عَ الدَّرَا..
يوسف
مَا فِي غَيْرُو.. بِيَّاعْ الدَّرَا.. هُوِّي الْعَمْ يِشْتْغِلْ ضِدْنَا..
عدنان
أَنَا قِلْتِلُّو لِلِمْعَلِّمْ طَنُّوسْ.. بِيَّاعْ الدَّرَا هُوِّي اللِّي بَاعْ إِبْنَكْ.. مَا كَانْ يْصَدِّقْنِي..
يوسف
هَلَّقْ بِيكُونْ فَاتِحْ عَ حْسَابُو.. وْعَمْ بيضَارِبْ عْلَيْنَا..
عدنان
أَللـه يِسْتُرْ مَا يْقَدِّمْ عَ الإِنْتِخَابَاتْ ضِدّ الِمْعَلِّمْ طَنُّوسْ..
يوسف
هَيْكْ طَوِيلِه عَ رَقِبْتُو.. رْصَاصَه زْغِيرِه بِتْجِبْلُو آخِرْتُو..
عدنان
وْشُو بِيعَرّفَكْ مَا عِنْدُو زِلِـمْ.. شُو بِيعَرّفَكْ مَنُّو مَسْنُودْ.. قِلِّةْ عِصَابَاتْ بْهَالِبْلادْ؟
يوسف
لَهْ يَا بِيَّاعْ الدَّرَا لَهْ .. مِنْ يَوْمْ اللّي شِفْتَك بْهَالشَّارِعْ.. عْرِفِتْ إِنَّكْ حَرَامِي..
عدنان
رُوح تَا نْخَبِّرْ الِمْعَلِّمْ طَنُّوسْ.. وْهُو بِيقِلّنَا شُو لاَزِمْ نِعْمِلْ..

**

اقلب الصفحة من فضلك