المشهدان السابع والثامن

المشهد السابع
"يوسف وعدنان بانتظار والدتهما أم يوسف"
يوسف
وَيْنِي هَالْخِرْفَانِه بَعِدْ مَا طَلِّتْ.. بِيكُونْ انْبَخَشْ دُولاَبْ التّرَانْ.. أَوْ قَبْعُوا الشَّجْرَه اللّي مْعَلّمِه فِيهَا الشَّارِعْ.. دَخِيلَكْ.. بَلَّشْ جِسْمِي يِبْرُدْ.. بَدِّي شِمّ..
عدنان
قَوِّي حَالَكْ شْوَيْ.. هَلَّقْ بْتُوصَلْ وْمَعَا الْقَبِضْ.. لَوْلاَ هَالْعَجُوزْ الْخِرْفَانِه كِنَّا مِتْنَا مْنِ الْجُوعْ..
يوسف
مَا كَانْ فِيِّي حَشِّشْ.. وْطِيرْ لَفُوقْ .. لَفُوقْ لَفُوقْ لَفُوقْ .. مِتْلِ الْعِرْنُوقْ يَا عِينِي مِتْلِ الْعِرْنُوقْ..
عدنان
سْمَاعْ يَا عِرْنَوْقْ.. أَنَا قَلِيلْ مْرُوِّه وْخَارِبْلِي بَيْتِي الْكَازِينُو.. بَسّْ إِنْتْ عَمْ تِقْتُلْ حَالَكْ.. شُو بَدَّكْ بِهَالِمْصِيبِه.. حَرَامْ تْمُوتْ بْأَوَّلْ عُمْرَكْ..
يوسف
حَكْيَكْ مِتِلْ حَكِي إِمَّكْ.. بِيقَرِّفْ
عدنان
بَدَلْ مَا تْحَشِّشْ .. شْرَابْ حَلِيبْ السّبَاعْ.. قَنِّينِة عَرَقْ مْتَلَّتْ.. وْعِيشْ يَا مَايْ بْرَازِرْ .. عِيشْ..
يوسف
إِنْتْ أَضْرَبْ مِنّي.. كِبْدَكْ رَحْ يِهِتْرِي.. وْبَعْدَكْ بِتْقُولْ.. عِيشْ
عدنان
لَيْكْ مِينْ عَمْ يِحْكِي لَيْكْ.. تْطَلَّعْ بِالِمْرَايِه بِتْشُوفْ عْيُونَكْ حِمِرْ مِنْ كِتْرِ السَّهَرْ..
يوسف
وَطِّي صَوْتَكْ.. وِصْلِتْ الْمَحْرُوسِه..

"تدخل أم يوسف"
أم يوسف
مْبَيَّنْ هَوْنْ يَا وْلاَدِي؟!
يوسف
جِينَا نِسْتَقِبْلِكْ بْرَاس الشَّارِعْ.. وْنِسْأَلْ خَاطْرِكْ..
أم يوسف
لَيْقُومْ اسْتِقْبَالْكُنْ هَالْمَرَّه مِتِلْ كِلّ مَرَّه..
يوسف
بْتَعِرْفِينِي أَنَا ما بْكَذِّبْ .. بَدّنَا مَصَارِي..
أم يوسف
مَا مَعِي مَصَارِي.. مْرَقِتْ عَ الْبَنْكْ وِدْفَعِتْ دَفْعِةِ الْبَيْتْ..
يوسف
وْلِيشْ تَا تِدْفَعِي دَفْعِةِ الْبَيْتْ.. مَا قِلّتِلِّكْ أَنَا بِدْفَعَا..
أم يوسف
وْلَيْشْ مَا دْفَعْتَا الشّهر الْمَاضِي.. واللِّي قَبْلُو .. واللّي قَبِلْ قَبْلُو..
يوسف
لأَنِّي حِرّ.. وْهَيْكْ طِلْعِ بْرَاسِي..
أم يوسف
لا يَا إِبْنِي لا.. بَيَّكْ تَرَكْنِي وْإِنْتُو زْغَارْ.. وْمَا خِلَّيْتْكُنْ تِنْزَتُّوا بِالشَّارِعْ.. هَلَّقْ شِي صِرْتُو كْبَارْ .. بَدّكُنْ تِزِتّونِي بَرَّا.. رُوحُوا اشْتِغْلُوا .. صِيرُوا عَالَـمْ مِتِلْ هَالْعَالَـمْ..
يوسف
دَخِيلْ أَللـه بَلاَ مْوَاعِظْ .. عْطِينِي قِرْشَيْنْ وْخَلِّينِي رُوحْ..
أم يوسف
وَيْنْ تْشَاكْ الِحْكُومِه.. مْبَارِحْ قْبَضْتُو؟
يوسف
عِزْرَايِلْ يِقْبَضْ رَوْحِكْ انْشَاللّـه.. عْطِينِي الشَّنْطَه لْهَوْنْ..

"يرمي أمه أرضاً"
عدنان
خُودْ الشَّنْطَه مِنْ إِمَّكْ بَسّ مَا تِضْرِبَا.. فْهِمْتْ
يوسف
هِيّي اشْتَرْيِتْ الْبَهْدَلِه لْحَالاَ.. يِقْلَعْ لِهَا وِلْهَالشَّنْطَه.. مْعَرِبْطَه فِيهَا كَأَنَّا رَحْ تَاخِدْهَا عَ الْقَبِرْ..
عدنان
هَاتْ تَا شُوفْ.. قِدَّيْشْ خِدِتْ مِنَّا..
أم يوسف
إِخِدْ دَفْعِة الْكَهْرَبَا.. وْدَفْعِةْ التَّلِفُونْ.. وْحَقِّ الأَكِلْ وِالشِّرِبْ
يوسف
لاَ بَدْنَا كَهْرَبَا وْلاَ بَدّنَا تَلِفُونْ وْلا بَدّنا نَاكُلْ وْنِشْرَبْ.. رُوحِي كِلِي عِنْدِ الْجِيرَانْ.. كِلُّنْ بِيحِبُّوكِي..
أم يوسف
لَيْشْ طِلِعْ حَظِّي هَيْكْ .. بِالإِنْجِيلْ فِي إِبِنْ شَاطِرْ وَاحِدْ .. عِنْدِي أَنَا في تْنَيْن.. لاَ بَيُّنْ طِلِعْ آدْمِي مَعِي.. وْلا وْلادِي طِلْعُوا أَوَادِمْ.. أَللَّـه يِحْمِيلِي يَاهُنْ تَا يْضَلُّوا طَيّبِينْ.. وْكَحِّلْ عْيُونِي بْشَوْفِتُنْ .. وْأَنَا رَاضْيِه يْضَلُّوا يِسِرْقُونِي.. وْيِضِرْبُونِي..
"تغني على لحن دقي يا ربابة"
ـ1ـ
دِقِّي دِقِّي يَا رَبَابَه
دِقِّي عَ الإِمّ وْشَبَابَا
جَوْزِي طَلَّقْنِي وْمَا فَكَّرْ
إِنُّو أَطْفَالُو غَلاَبَا
ـ2ـ
رَيَّشُوا .. كِبْرُوا وِصَارُوا
يِسْرِقُوا الْبَيْتْ وْحِجَارُو
مَرَّضُونِي.. عْيُونِي غَارُوا
وأَنَا فِي عِزِّ الشَّبَابَا
ـ3ـ
خَفِّفْ يَا رَبِّي عَذَابِي
رَجِّعْ الرَّحْمِه لْشَبَابِي
هِنّي الْحَرْقُولِي اغْتِرَابِي
وْزَرْعُولِي بْقَلْبِي الْمَصَابَا
ـ4ـ
مَحْلَى الْعِيشِه بْأَرْض بْلادِي
زَيْتُونْ وْجِبْنِه الزُّوَّادِه
كِنِتْ فِيهَا رْبِحْت وْلادِي
وْمَا دِقِتْ مُرِّ الْعَذَابَا
**
المشهد الثامن
"موسيقَى رَاقِصَة، عرس سامي ونجيبة، مدعوون ومدعوات"
عزيزة
آوِيهَا يَا بِنْتِ الْخَيّ يَا بِنْتِ الشَّهَامِه
آوِيهَا يَا بِنْتِ الْعِزّ يَا بِنْتِ الْكَرَامِه
آوِيهَا نِيَّالْ يَللّي تْجَوَّزِكْ نِيَّالْ
بَدْرِ السَّمَا إِنْتِي وْغَيْرِكْ صْرَامِه
أم سامي
شُو هَالْحَكِي يَا عَزِيزِه..
الظَّاهِرْ نَاوْيِه تِعِمْلِي مْشَاكِلْ؟
عزيزة
هَيْكْ أَنَا شَايْفِه بِنْتْ خَيِّي.. وْمَا حَدَا خَصُّو فِيِّي..
أم سامي
لا يَا سِتّْ عَزيزِه .. إِبْنِي كَمَانْ لُو قِيمْتُو.. مَاتِتْ عْلَيْه بَنَاتِ الشَّارِعْ.. كمان لا تِنْسِي إِنُّو بَيُّو مْرَشَّحْ عَ النّيابِه.. عَرِّمْ يَا مَامَا عَرِّمْ..
لبيبة
وْشُو بِهَا بِنْتِي؟ بِنْتِي قَمَرْ.. بِنْتِي شَمِسْ.. بِنْتِي صِرْمَايِتَا بِتْنَقِّطْ شَرَفْ..
أم سامي
وْلِكْ سْكِتِي.. ضِلَّيْتُو تْلاتْ تِيَّامْ تِنِتْفُو دَقْنَا.. وِتْحَنُّو شْوَارِبَا.. تَا ظَبْطِتْ
لبيبة
لَيْكْ كِيفْ بِتْفَنْجِرْ عْيُونَا لَيْكْ.. إِبْنِكْ مِتِلْ قَشِّةْ الْمِكِنْسِه.. وْمَا فْتَحْنَا تِمّنَا..
حسنة
يَا جَمَاعَه عَيْبْ.. صَرْلُنْ نِصّْ سَاعَه طَالْعِينْ مْنِ الِكْنِيسِه.. مَا حَلّكُنْ تْمَشِكْلُوهَا..
لبيبة
وْلِي بِنْتِي .. إِنْتِي شُو حِبَّيْتِي بْهَالْقِرْدْ؟..
نجيبة
عْيُونُو.. عْيُونُو بِيضَوُّوا مِتْلِ عْيُونْ الِبْسَيْنَاتْ..
لبيبة
قِلِّة بْسَيْنَاتْ بْهَالِبْلاَدْ يَا بِنْتِي.. كِنْتْ جِبْتِلِّكْ كِلّ بِسّ وْلاّ التَّانِي.. وْلا تْبِهْدَلْنَا هَالْبَهِدْلِه..
طنوس
وْإِنْتْ يَا إِبْنِي.. شُو حِبَّيْتْ بْهَالْمَقْرُودِه؟
سامي
شَعْرَا يَا بَابَا شَعْرَا.. كِلّ مَا يْدِقّ بْمِنْخَارِي بْصِيرْ عَطِّسْ..
طنوس
وِلِكْ يَا مَرَا لَيْشْ مَا عْمِلْتِيلُو فَاصُولْيَا؟
أم سامي
الْفَاصُولْيَا مَا بِتْعَطِّسْ .. بْتِعْمِلْ مَفْعُولْ عَكْسِي..
طنوس
طَيِّبْ .. لَيْشْ مَا رِشَّيْتِيلُو بْهَارْ بِمْنَاخِيرُو.. مَا كَانْ عَطَّسْ تَا شِبِعْ..
أم سامي
مْصِيبِه .. وْبَدَّا تُوقَعْ عَ رَاسْنَا..
لبيبة
بِنِتْنَا مْصِيبِه يَا بِنْتْ قَرَاقُوشْ.. وَيْنْ الْمُوبَايْلْ فُونْ.. عْطُونِي الْمُوبَايْلْ فُونْ عَجّلُوا..
حسنة
رُوقِي يَا إِمّ الْعَرُوسْ رُوقِي.. مَا بْيِسْوَا هَيْكْ..
لبيبة
الْخُورِي اللِّي جَوَّزَا بِيطَلِّقَا.. أَلُو أَبُونَا.. أَيْوَه .. أَيْوَه.. هَيْدَا أَنَا لبيبة إِمْ الْعَرُوسْ.. لا يَا بُونَا لاَ .. أَللّـه مُشْ رَحْ يْهَنِيهُنْ..
عزيزة
خَلِّينِي إِحْكِي مَعُو أَنَا.. أَلُو أَبُونَا.. الْعِرِسْ فَرَطْ.. وْإِذَا مَا بْتِجِي.. الدَّمْ رَحْ يُوصَلْ لِلْرِكَبْ.. بَدَّكْ تِحْكِي مَعْ بَيّ الْعَرِيسْ.. وْلِكْ لَشُو تِحْكِي مَعْ هَالْمَسْطُولْ..
طنوس
أَلُو أَبُونَا.. إِنْتْ بْتَعْرِفْنِي أَكْتَرْ مِنْ غَيْرَكْ.. أَقَلْ مِنْ خَمِسْ دُولارَاتْ مَا بْحِطّ بِالصَّيْنِيِّه..
وْكِلّ مَا شُوف سَيِّدْنَا بْنِخّ بُوس إِيدُو.. وِبْعَلِّمْ وْلاَدِي عِنْدْ الرَّاهْبَاتْ..
أم سامي
عْطِينِي هالتَّلِفُونْ لْهَوْنْ.. لَيْكْ يَا بُونَا.. كِلِمْتَيْنْ وْبَسّ.. بَدّنَا نْطِلِّقْ..
أم كلاكيش
يَا جَمَاعَه.. تْرِكُوا لِلصُّلِحْ مَطْرَحْ.. خَلُّوا الْعِرْسَانْ يِتْهَنُّوا.. مْحَضّرتلُن غِنِّيِّه بِتْجَنِّنْ..
أبو قشّه
وأَنا كمانْ مْحَضّرْلُنْ قَصِيدِه من كَعب الدّستْ.. يا ضيعان الشِّعر..
بائع الذرة
هَلّق وَقت الغناني والشّعر.. شُوفوا شُو بَدّنَا نِعْمِلْ بِالِهْدِيِّه.. مِنْرَجِّعَا مَعْنَا عَ الْبَيْتْ؟
بو قشّة
عَم بِيقُولُولَكْ فَرْطُوا.. حْمَالْ هْدِيتَكْ وِهْرُوبْ..
بائع الذرة
خَيّ .. هَيْدِي رَابِع مَرَّه بْيِفْرُطْ عِرْسْ.. وِبْوَفَّرْ حَقّ الدّراياتْ.. يَلْلاّ.. مَصَائِبُ قَوْمٍ عِنْدَ قَوْمٍ فَوَائِدُ..
أبو قشّه
لا تْقِللِّي لافِف عْرانيسْ دَرَا بْوَرْقِة الهديِّه؟
بائع الذرة
"يحمل هديته ومثله يفعل أبو قشّه وأم كلاكيش"
عَ الدَّرَا .. الدَّرا.. عَ الدَّرا
حسنة
يَا نَاسْ .. يَا هُو.. اللّي اخْتَلْفُوا هِنّي أَهْل الْعَرِيسْ وِالْعَرُوسْ.. الْعِرْسَانْ بَعْدُنْ مِتِّفْقِينْ..
شوفو كيف مْكَبّشِينْ بْبَعْضُنْ..
لبيبة
أَبَداً.. الْبِنْتْ اللِّبْنَانِيِّه مَا بِتْوَطِّي شْوَارِبْ بُوهَا..
أم سامي
والشَّبّ اللِّبْنَانِي مَا بْيِدْعَسْ كِلْمِةْ بَيُّو.. فْهِمْتُو..
"ينقسم المدعوون إلى قسمين.. قسم مع أهل العروس وقسم مع أهل العريس"
حسنة
وْلاَدْ مِرْضِيّينْ كْتِيرْ.. لاَ بِيهِشُّوا وْلاَ بِينِشُّوا..
رامز
هَلَّقْ بِيطَلّقُوهُنْ مِنْ مَيْلْ.. وْبْيِرْجَعُوا يْجَوْزُوهُنْ بْلِبْنَانْ مِنْ مَيْلْ تَانِي.. وْمَا حَدَا بْيَعْرِفْ أَيَّا بَيْتْ رَح يِخِتْرِبْ..
حسنة
وِالْمْصِيبِه.. مَا بِيقُولُوا إِنُّنْ كَانُوا مْجَوْزِينْ.. وْبِسّ يُوصَلُوا لْهَوْنْ بْيِنِكْشِفْ السِّرّ.. وِبْتِطْلَعْ الصَّرْخَه .. وِبْيِرَجَعْ الطَّلاَقْ يِمِدّ قْرُونُو مِنْ رَاجِعْ وِجْدِيدْ..
رامز
يَا عَمِّي شُو هَالزَّمَنْ هَيْدَا.. مْبَارِحْ شَبَّيْنْ لِبْنَانِيّي تْجَوْزُوا بَعْضُنْ عِنْدِ الِحْكُومِه.. صَارُوا إِهْلُنْ يِجْعَرُوا مِتْلِ الْبَقَرْ.. بَسّ شُو طَالِعْ بِالإِيدْ.. بْلاَدْ حِرِيِّه.. وِالْمُشْ عَاجْبُو يْبَلِّطْ الْبَحِرْ..
حسنة
سِتّ بَنَاتْ لِبْنَانِيِّي كَانُوا مَاشْيينْ بِالمَارْدِي غْرَا "محل ما النسوان بيحبّوا نسوان".. وْعَمّ بِيهَيّصُوا وِيْزَقّفُوا.. وْكِلّ مَا يْدِيرُوا عْلَيُّنْ الْكَامْرا.. كَانُوا يْهَوُّوا لِلنَّاسْ وِالدِّنِي مُشْ سَايْعِتْهُنْ..
أَللّـه يِسْتُرْ عَ بْنَات النَّاسْ تَا يِسْتُرْ عَ بْنَاتْنَا..
رامز
إِذَا الأَهْلِ رَحْ تْضَلّ جْمَاجِمُنْ مْسَكّرَه.. وْلاَدُنْ رَحْ يْضِيعُوا بْهَالِبْلاَدْ.. وْفَوْقْ هَيْدَا وْكِلُّوا بِيسِبُّوا أستراليا.. هِنِّي نَزَعُوهَا.. وِبْيِرْجَعُوا يْسِبُّوهَا.. شُوفُوا مِلاّ عْقُولْ مْتَيّسِه..
حسنة
كِلُّنْ بِدُّنْ الْوَجَاهَه.. حَتَّى طَنُّوسْ التِّنِكْلِيزِي مَا بَقَى يِتْحَكَى..
رامز
وَطِّي صَوْتِكْ لَيِسْمَعِكْ حَدَا مِنْ أَزْلاَمُو وْيِمْسَحْ فينا الأَرْضْ..
حسنة
َيا رَبِّي لا تْنَجِينَا.. مِنْ بَعِدْ مَا كَانْ زَلْمِةْ زَعِيمْ.. صَار عِنْدُو زِلِمْ..
رامز
خَلّينا بْمَوْضُوعْ الْعِرْسْ.. حَدَا يِتِصِّلْ بِالْخُورِي بَرْكِي بْيِقْدُرْ يْحِلاَّ..
حسنة
مُشْ رَحْ تِنْحَلّْ.. صَارِتْ قَضِيّتُنْ مْعَقّدِه مِتِلْ قَضِيِّةْ الشَّرْقْ الأَوْسَطْ
(يدخل الأبونا مسرعاً)
وِصِل الأَبُونَا.. يَا أَهْلاَ بِالأَبُونَا.. مَا فِي غَيْرَكْ بِيحِلاَّ..
الخوري
أَنَا جَايِي إِحْكِي مَعْ أَصْحَابْ الْعَلاقَه بَسّ.. مَع الْعَرِيسْ وِالْعَرُوسْ..
لبيبة
الْعَرُوسْ مَا بْتِحْكِي تَا تِحْكِي إِمَّا..
أم سامي
وِالْعَرِيسْ مَا بْيِحْكِي تَا تِحْكِي إِمُّو..
الخوري
أوَّلاً.. بِسْمِ الآبْ والإِبِنْ وَالرُّوحْ الْقُدُسْ الإلَه الْوَاحِدْ آمِينْ .. تَانِياً.. أَللّـه يِخْزِيكْ عَنَّا يَا شِيطانْ.. تَالِتاً.. إِنْتُو شُو خَصّكُنْ؟.. وَيْنْ إِمِّكْ وْوَيْنْ إِمَّا.. يِمْكِنْ مَكْتُوبْ مَا بِتْوَدُّولُنْ عَ لِبْنَانْ.. خَرِجْكُنْ بَسّ تِخِرْبُوا بْيُوتْ وْلادْكُنْ.. الْعَمَى، مَا بِتْخَافُوا أَللّـه؟.. قَرِّبْ يَا إِبْنِي.. وْقَرّبِي يَا بِنْتِي.. مِنْ نِصّ سَاعَه سْأَلْتْكُنْ إِذَا بَدكُنْ بَعِضْكُنْ.. قِلْتُو نَعَمْ يَا أَبَانَا.. صَحّ
نجيبة
صَحّ يَا أَبُونَا صَحّ.. بَسّ عَمّتِي عَزِيزِه شَعّلِتَا.. غَنِّتْ آوِيهَا مِنْ كَعْبِ الدِّسِتْ..
الخوري
عَمّتِكْ عَزِيزِه.. لا عِرْفِتْ تِتْجَوَّزْ وْلا رَحْ تْخَلِّي حَدَا يِتْجَوَّزْ.. بَدِّكْ تْصِيرِي مِتْلاَ؟
نجيبة
لا يَا أَبُونَا لا.. بْبُوسْ إيدَكْ صَالِحُنْ.. أَنَا بْحِبّْ جَوْزِي كْتِيرْ..
الخوري
وْإِنْتْ يَا إِبْنِي شُو قِصّتَكْ..
سامي
عَمِّتَا شَعّلِتَا.. وْإِمِّي لَغْمِتَا.. وْأَنَا رَحْ يِنْفَجّ رَاسِي.. مُشْ عَارِف مِينْ بَدِّي إِرْضِي..
الخوري
رْضِي رَبَّكْ وْمَرْتَكْ.. مَرْتَكْ صَارِتْ بَيْتَكْ.. حَدّا بْيِخْرُبْ بَيْتُو؟
سامي
أَنَا بْحِبْ مَرْتِي كْتير.. وْمَا بِيبَعِّدْنِي عَنَّا إِلاَّ الْمَوْتْ..
الخوري
فَإِذَنْ .. نْكَايِه فِيهُنْ كِلُّنْ .. مْسِكُوا بْإِيدَيْنْ بَعِضْكُنْ وْشِدُّوا.. وْقُولُولُن: اللّي بْيِنِرْبِطْ بِالسَّمَا مَا بْيِقْدِرْ يْفِكُّو إِنْسَانْ..
بائع الذرة
رَاحِتْ عْلَيِّي .. صَارْ بَدِّي قَدِّمْ الِهْدِيِّه..
الخوري
قَرّبُوا تْبَاوْسُوا وْسَلّموا عَ بَعِضْكُنْ.. وْقُولُوا لْعَزِيزِه تْرُوحْ تْخَيِّطْ بْغَيْرْ هَالِمْسَلِّه.. يَلَّلا وَيْنِ الْمُوسِيقَى.. الْعِرْسْ بْلا مُوسِيقى مِتْل الْقِدَّاسْ بْلاَ نْبِيدْ..
"موسيقى راقصة"

**

اقلب الصفحة من فضلك