المشهد السادس

المشهد السادس
"عزيزة تدخل فرحانة"
عزيزة
هَنُّونِي .. هَنُّونِي هَنُّونِي هَنُّونِي..
نجيبة
خَيْرِ انْشَاللـه يا عمتي.. إِجَاكِي عَرِيسْ؟!
عزيزة
بَلا عَرِيسْ بَلا بَلُّوطْ.. صِرْتْ مُذِيعَه بِالإِذَاعَه..
وْبَدِّي قَدِّمْ مَا يَطْلُبُهُ الْمُسْتَمِعُونْ..
نجيبة
صَحِيحْ .. وْلِكْ رِيْتُو أَلِفْ مَبْرُوك..
وِانْشَاللـه رَحْ يِدْفَعُولِكْ مَصَارِي..
عزيزة
يِقْطَعْ الْمَصَارِي انْشَاللـه.. لا هِنِّي بْيِدْفَعُوا وْلاَ أَنَا فِكَّرْتْ فِيهَا.. بَدِّي مَرْكَزْ إِجْتِمَاعِي..
بَدِّي شُهْرَه.. بَدِّي رُوحْ عَ حَفْلاتْ الْكُوكْتِيلْ..
بَدِّي جِخّْ.. بَدِّي بَيِّنْ..
نجيبة
يِعْنِي.. فِيني إتِّصِلْ فِيكِي وْإطْلُبْ أَغَانِي وْإِهْدِيهَا لْسامي..
عزيزة
يِقْطَعِك عَ يِقْطَعْ سَامِي..
نجيبة
إذا عَمْ تِحْكِي عْلَيِّي وْعَ سامي هَيْك..
مُشْ رَحْ إتصّل فيكي
عزيزة
كِلّ يَوْمْ لازِمْ تِتصْلي فِيّي .. ولازِمْ تْغَيّري إِسْمِك وْصَوْتِك.. تا ما يَعِرْفُوا إِنّي عمّتِك..
"يدخل رستم"
رستم
شايِفْكُن مَعْجُوقِين.. خَير انْشاللّه؟
نجيبة
عمتي عزيزة صارت مذيعة كبيره..
يا هْنِيَّال الْبَدُّو يِتْجَوَّزَا..
"عزيزة تعرّم وتنفخ صدرها"
رستم
عظيم عظيم.. بما إني صحفي وراجع من لبنان
لازم تِعِمْلِي مَعِي مُقَابْلِه عَ الْهَوَا..
عزيزة
بِعْمِلْ مَعَكْ مُقَابْلِه عَ الْهَوَا..
عَ الْمَيّ .. عَ النَّارْ..
عَ شُو مَا بَدَّكْ..
رستم
هَاتِي .. سَمّعِينَا.. تَا نْشُوفْ..
عزيزة
سَيِّدَاتِي سَادَتِي .. مُقَابَلَتِي الْيَوْمْ سَتَكُونُ مَعَ الصُّحُفِي الْكَبِيرْ.. صَاحِبْ الْفِكْرِ الْمُنِيرْ.. وَالَّذِي يَعْرِفُهُ الْكَبِيرْ والصَّغِيرْ.. وَالِمُقَمَّطْ بِالسَّرِيرْ..
فِيكْ تْقِول للمستمعين شُو إِسْمَكْ؟
رستم
شُو بَدِّكْ بِإِسْمِي .. كِلُّنْ بْيَعِرْفُو صَوْتِي.. أَنَا صَاحِبْ جَرِيدْة (الشَّمْسْ) اللّي بْتِصْدُرْ مِنْ عَشِيِّه..

عزيزة
يَا إِسْتَاذْ رستم ..
رستم
قِلْتِلِّكْ بَلا أَسْمَاءْ .. الْعَالَمْ تِعْبُوا مْنِ الأَسْمَاءْ ..
عزيزة
طَيِّبْ .. فِيكْ تْقِلّلي مِينْ رَحْ تِنْتِخِبْ بْهَالإِنْتِخَابَاتْ..
رستم
بِنْتِخِبْ الّلي بْيِدْفَعْ أَكْتَرْ..
عزيزة
اللّي بْيِدْفَعْ شـُو..؟
رستم
قَصْدي .. اللي بْيِدْفَع شَعْبُو لْقِدَّامْ.. لَيْكِي .. هَيْدَا اللي إسمو طَنّوس .. بَدُّو يِرْبَحْ..
عزيزة
طَنُّوس التِّنِكْلِيزي.. مَا غَيْرُو؟!
رستم
كَانْ تِنِكْلِيزِي .. وْهَلَّقْ صَارْ فَوْقْ.. وْمَا فِي حَدَا يْطَالُو..
عزيزة
مُشْ مَعْقُول هَالْحَكِي ..
طَنُّوسْ الْمَنْحُوسْ مْرَشَّحْ عَ الإِنْتِخَابَاتْ؟!
رستم
كَصُحُفِي عَتِيقْ .. ما كِنْتْ لاَزِمْ إِكْشُفْ هَالسِّرْ ..
بَسّ الْحَقِيقَه رَحْ تِظْهَرْ،
وْلازِمْ كِلّنَا نِنْتِخبْ الْخَوَاجَه طَنُّوسْ..
عزيزة
عَ قَطِعْ رَاسِي.. زَلْمِي مَا بْيَعْرِف يِحْكِي كِلِمْتَيْنْ ..
كِيفْ بَدِّي إِنْتِخْبُو؟!
رُوحْ صَحِّحْ مَعْلُومَاتَكْ ..
طَنُّوسْ زَلْمِي مْعَتَّرْ.. لا بيهِشّْ وْلا بِينِشّْ
رستم
قَصْدِكْ أَنَا كِذّابْ .. الْحَقّ عْلَيِّي اللّي فْضَحْتْ هَالسِّرْ..
بُكْرَا شُوفي صُورْتُو بِالْجَرِيدِه قَدّْ رَاسِكْ..
عزيزة
سَيِّدَاتِي سَادَتِي .. مِنِشْكُرْ صَاحِبْ جَرِيدِة الشَّمْسْ
عَ هَاللِّقَاءْ الْغَيْرْ شِكَلْ..
رستم
وْأَنَا كَمَانْ بْحِبّ إِشْكُرْ إِخْتِي سعدى.. وْكمانْ إِنْتِي.
عزيزة
بيشَرَفَك شُو رَأْيَكْ فِيِّي؟
رستم
لِلْحقِيقَه يا سَعْدى نْجَحْتي بالامتحان..
وصار فيني هَنِّي أهل شارِعْنا فيكي..
عزيزة
جَرِّبْنِي بَعد.. أنا بعجْبَك يا رورو
رستم
شُو هَيْدَا رُورو..
عزيزة
طَيّبْ شُو فِيها إذا غنّجتَك شْوَيّ.. إي رورو
رستم
ما فيها شي أبداً.. إسْم رورو عجَبْني..
شو الْمَطْلوب مِنّي هَلَّق؟
عزيزة
اتصل فيّي تلفونياً.. أَلله يخلّيكْ
"يضع تلفونه النقال على أذنه"
رستم
أَلُو.. حَضْرِة الْمُذِيعَه .. بَدِّي إِهْدِي غِنّيِّه لأمي..
عزيزة
عَجِّلْ إِنْتَ عَ الْهَوَا.. فِيكْ تْقِلّي شُو إسْمَا..
رستم
صِرْتْ مِتْلَكْ بَيّ يَا بَيِّي..
عزيزة
سَيِّدَاتِي، سَادَتِي، بِمُنَاسَبَةِ عِيدِ الأُمْ نَسْتَمِعُ إِلَى أُغْنِيَةِ (أَنْتَ عُمْرِي) لأُم كَلسُونْ.. وهي مُهْدَاة مِنْ جَبُّورْ وَبَرْبُورْ وَحَنْتُورْ إِلَى وَالدِهِمْ الْمَقْهُورْ بِمُنَاسَبَةِ عِيدِ الأُم....
رستم
وَيْنْ الْغِنِّيِّه .. مُشْ سَامِع شِي؟!
عزيزة
يَا مْهَنْدِسِ الصَّوْتْ حِطّ الْغِنيِّه.. أَكِيدْ عَالِي مَعُو الشَّحِمْ بِالدَّمْ.. وْعَمْ بِيشَنْخِرْ بِالسّتِدْيُو.. سَيّدَاتِي سَادَتِي أعْتَذِرُ عَنْ هَذَا الْعِطْلِ الْفَنِّي.. وَأَتْرُكُكُمْ الآن على أمل اللقاء.
نجيبة
والله يا رستم.. إنت وْعمّتي لابقين لبعضكُنْ.. طَنْجرَه وْلقيت غطاها.. شوفو شو بدّكُن تعمْلُوا.. قبلْ تْهِرّوا عَ الأرضْ.
عزيزة
"تطلع بساعتها"
صار وقت برنامجي.. لا بقى تِحْكُوا..
"تسرع إلى الراديو.. تديره.. يعلو صوتها"
أَلُو مين مَعي؟
"يظهر الشاعر بو قشّه على طرف المسرح وهو يتكلم على الهاتف"
أبو قشه
مَعك الشَّاعِرْ أَبُو قَشِّه.. بْبَلِّشْ ..
عزيزة
تْفَضَّلْ..
أبو قشّه
كَانْ جِدِّي زَلْمِي خِتْيَارْ
وْكَانْ عِنْدُو شْوَارِبْ كْبَارْ
وْكَانْ يْحِب الْكُوسَى كْتِيرْ
وْصَابِيع الْبِبّو يَا خْيَارْ
وْكَانِتْ سِتِّي مِتْلِ الزِّيرْ
بِتْصَارِعْ أَكْبَرْ حْمَارْ
لَكِنْ فِي عِنْدَا صْرَاصِيرْ
بِتْخَافْ مِنُّنْ.. يَا سِتَّارْ..
عزيزة
هَيْدَا شِعِرْ وَلاَّ شْعِيرْ
هَيْدِي صُوَرْ وَلاَّ حْجَارْ
بَعْدِ مَا سْمِعْنَا التِّعْتِيرْ
انْقَطَشْ مِنْخَارَكْ وْطَارْ...
نُنْهِي بَرْنَامَجَ الْيَوْمْ ..
مَعَ الصَّوْتْ الْمَهْجَرِي الرَّائِعْ..
مَعَ دَلُّوعَةِ الْمَسْرَحْ أَلْفَنَّانَه الْكَبِيرَه إِمّ كْلاَكِيشْ.
"تظهر الفنانة أم كلاكيش على طرف المسرح، تغني على لحن حدا يا حدي"
أم كلاكيش
ـ1ـ
غَزَالَ الْحَيّ
مَا عِنْدُو مَيّ
وَيْنِ الْمَيّ
يَا خَالَه
شَرْبِي PEPSI
مْنِيحَه الْـPEPSI
أوْ شَرْبِي Coca-Cola
غَزَالَ الْحَيّ
مَا عِنْدُو مَيّ
وَيْنِ الْمَيّ
يا خَالَه
ـ2ـ
إِبِنْ لُبْنَانْ
بِـ هَالْهِجْرَانْ
كِيفْ مَا كَانْ
عَمْ يِمْشِي
بْيِمْشِي شَرْقْ ب
ْيِمْشِي غَرْبْ
بْيِمْشِي طْلُوعْ
مَعْ دَفْشِه
ـ3ـ
تْرَكْنَا الأَرْضْ
بسَاعِةْ بُغْضْ
بَرْكِي الْعَرْضْ
مِنْصُونُو
بِعْنَا الْعَرْضْ بْطُولْ وْعُرْضْ
وِتْسِلَّيْنَا بِعْيُونُو
حِدَا يَا حْدَيْ
غَزَالَ الْحَيّْ
وَرَدْ عَ الْمَيّ
تَا يْمَلِّي
**

اقلب الصفحة من فضلك