المشهدان الأول والثاني

المشهد الأول
(موسيقى راقصة ـ أحد شوارع هاريس بارك المكتظة باللبنانيين ـ عزيزة ونجيبة ترقصان وطنّوس يصفّق، يدخل الخوري محتجاً)
الخوري
شو هَالْهَيْصَه حَدّ الِكْنِيسِه؟ ما عدتْ إِسْمَعْ صَوْتِي أنا وعَمْ قَدّس أَو أَعْرِف كِيف بَدِّي خَلِّصْ الْقدَّاسْ تا إِجِي وْحاكِيكُنْ..
نجيبة
أللّـه مَعَكْ يا بُونا.. كِيفْ حالْ قِدْسَكْ الْيَوْم؟
الخوري
فِيكِي تْقُولِيلِي لَيْش عَم تِرِقْصُوا بالشَّارِعْ؟
نجيبة
مِتِلْ ما بْتَعْرِف يا بُونا.. شَارِعْنَا مْسَكَّرْ وْكِلُّو لِبْنانِيّين ..
وْكِلُّنْ بِيحِبُّوا الرَّقِصْ..
الخوري
هَالشَّارِعْ قَريب كْتِيرْ عَ ِكْنِيسِة سَيّدة لُبْنان، الْمَرّه التانْيِه بَدَلْ ما تْعَكّرُوا عْلَيْنا فُوتُوا سْمَعُوا الْقِدَّاسْ.. كَمانْ لا َتِنْسُوا إِنّو الْمُوسِيقَى الْعَالْيِه بِتْجِيبْ البُولِيس..
عزيزة
لا تْخَافْ يَا بُونا .. الْبُولِيسْ مَا بْيِجِي لْعِنَّا.. وْإذا إِجَا مِنْطَعْمِيهْ كبِّه نَيِّه مَعْ كاسْ عَرَقْ..
تْفَضَّلْ ْهِزّ خَصْرَك شْوَي..
الخوري
صَارْ لازِمْلِك إعتِرافْ يا عَزِيزِه.. بَرْكِي أَللّـه بْيِرِزْقِك عَريسْ
وْبيقَصّرلِكْ لْسانِكْ شْوَيّ.
عزيزة
لَيْش الرَّقص خَطِيِّه يا بُونا؟ تْعَا تا عَلّمَكْ الرَّقصْ
الْخُوري
عِنْدِي دَفْنِه بِكْنِيسِةْ مارْ شَرْبِلْ وما لازِمْ إِتْأَخَّرْ
"يخرج الأبونا"
أم يوسف
"تطل من شباك بيتها"
وَطُّوا صَوْتْكُنْ يا جَماعَه.. أنا مَرا خِتْيارَه وبدّي نَامْ
عزيزة
شُو بِكِي يَا إمْ يُوسِفْ هَيْئتِك مِتْل الْبُونا..
مَا بِتْخَلِّينَا لا نِحْكِي وْلا نِرْقُص..
أم يوسف
"تخرج الى الشارع"
أنا مَرَا شَغِّيلِه.. عِنْدِي وْلادْ بَدِّي طَعْمِيهُنْ .. مُشْ مِتِلْكُنْ .. قَاعْدِينْ عَ الْمِدْرِي شُو إسْمُو؟
طنّوس
إِسْمُو .. نَابِلّيُون بُونَا ِبرْتْ أُوفِيسْ
أم يوسف
بُونَا بِرْت أُوفِيسْ!! كَانِتْ ظَبْطِت أَكْتَرْ لَوْ قِلْتْ بُونَا مَارُونْ.. بُونَا أَنْطُونْ.. إِسْمُو الأَنِمبْلُويْمِنْت أُوفيسْ
طنوس
شُو ما كَانْ إِسْمُو يْكُونْ .. لْسَانِي بَلَّشْ يِظْبُطْ بِالتِّنِكْلِيزِي..
أم يوسف
أَللّـه يْجَرّصَكْ يَا طَنُّوسْ.. لْسَانَكْ مِتْل الْحَيِّه..
طنوس
شُو عَمْ بِتْقُولِي يا أمّ يوسِف؟
أم يوسف
ما قِلْتْ شِي أَبَداً.. لُغّتَكْ التِّنِكْلِيزِي مِمْتَازِه
طنوس
*أَنَا عارِفْ هَالشِّي..
مْبَارِحْ رِحِتْ عَ بُورْمَتَّا وِاشْتَرَيْت بِيسِي..
أم يوسف
واللـه .. وْشُو لَوْنَا هالبيسي؟
طنوس
لَوْنَا .. قَرِيب كْتِيرْ مِنْ لَوْنْ الْكَعْكُولاَّ.
عزيزة
بْتَعْرِف يَا طَنُّوسْ.. إِذَا عِرْفِتْ فِيكْ شِرْكِةْ الْبِيبْسي كُولا والْكُوكَاكولاَ .. بْيِخِرْبُوا بَيْتَكْ..
طنوس
بْيِخِرْبُوا بَيْتِي.. لَيْشْ شُو عْمِلْتْ ؟!
عزيزة
وْبَعْدَكْ عَم تِسْأَلْ..
رُوحْ عَ بَيْتَكْ قَبِلْ مَا تِنْزَعْ إِسِمْ شي شِرْكِه جْدِيدِه..
طنوس
وَاللَّـه بْهَالشَّارِعْ مَا حَدَا عَم يِفْهَمْ عْلَيِّي.. حتّى مَرْتِي أم سامي.. بُكْرا رَحْ رُوحْ عَ سِيدْنَا.. وْمِدّ جْرَيِّي عَ الْبَحرْ..
عزيزة
Say hello do the Darling Harbour
طنوس
آخِدْ معي لَفْلُوفِةْ زَعْتَرْ .. مُشْ رَحْ آكُلْ هَامْبِرغَر..
الزَّعْتَرْ مْنِيحْ لِلْمَرَا الِـبْرِغْنَا..
أم يوسف
لَيْش ما بِتْرُوحْ هَلَّق عَ سِيدْنِي
وْبِتْرَيِّحْنا مِنَّكْ وْمِن غْلاظْتَكْ..
طنوس
بَايْ بَايْ .. إِفِيرْ وَنْ
أم يوسف
أللـه مَعَكْ يَا طَنُّوسْ .. يَا مَنْحُوسْ
عزيزة
هَالطّنُوسْ هَيْدَا .. مُشْ مَعْقُولْ يِحْكِي إِنْكْلِيزِي ..
لاَزِمْ نْسَمِّيهْ طَنُّوسْ التِّنِكْلِيزِي.
أم يوسف
صَرْلُو سِنْتَيْنْ عَمْ بِيرُوح عَ ْمَدْرَسة الإنكليزي ..
وْكِلّ سِنِه بْيِعطُو شْهَادِه طُولو.. وْمَعْ هَيْدَا وْكِلُّو بيضَلّ طِشّ..
عزيزة
مأكّد حَدَا عَم يِعْمِلُّو فَرْضُو..
نجيبة
لا بَقَا تِحْكُوا عَ طنّوس.. خَلُّونَا بِالأَعْظَمْ ..
عزيزة
وشُو هُوِّي الأَعْظَمْ يَا بِنْت خَيّي؟ الظّاهِر بَعْدِك بِتْحِبِّي إِبْنُو سامي.. صَحّ أم غِلْطانِه؟
نجيبة
"تتلبّك بعض الشيء"
لا أبداً يا عَمّتي.. بَسّ جَايِي الإِنْتِخَابَاتْ
وْلاَزِمْ نْكُونْ صَوْتْ واحِدْ..
عزيزة
صَوْتْ وَاحِدْ!! .. بَدِّكْ عَجِيبِه مْنِ السَّمَا..
نجيبة
لازِمْ نِنْتِخِبْ الشَّخْصْ الْقَادِرْ يْسَاعِدْنَا.. الشَّخْصْ الْـ بِيخَلِّينَا نْنَامْ بِبْيُوتْنَا مِنْ دُونْ فَزَعْ.. الشَّخْص اللّي مَا بْيِتْبَرْطَلْ..
عزيزة
فَإِذَنْ .. لازِمْ نِنْتِخِبْ قِدِّيسْ مِنْ بَيْنْ هَالْقِدِّيسينْ..
أم يوسف
بْسِيدْنِي بَسّ.. صارْ عنَّا مْرَشّحِينْ لبْنانيين عَ الانْتِخابات.. أَكْتَرْ ما عِنَّا مُغْتِرْبينْ
عزيزة
هَيْدي هِيِّي الدّيمقراطِيّه.. طِلِع مِنَّا رؤساء ووزراء ونُوّاب.. وأَللَّه يْزيدُنْ..
أم يوسف
ما شِي بِالْكِتْرِي.. جِينَا عَ أُوسترالْيَا تا نْعِيشْ بِأَمَانْ ..
وَيْنْ الأَمَانْ؟ الشّاطِرْ يْلاَقِيه..
"يطل طنوس مجدداً"
طنوس
وْشُو بْتِعْطِينِي إِذَا لْقَيْتُو..
أم يوسف
مَا حَدَا فِي يْلاَقِيهْ.. صَرْلُو سْنِينْ ضَايِعْ..
طنوس
تْعَا بِسْ بِسْ بِسْ .. تْعَا بِسْ بِسْ بِسْ
أم يوسف
لْمِينْ عَمّ بِتْبِسْبِس يَا ذَكِي عَصْرَكْ؟
طنوس
لِلأَمَانْ.. الأَمَانْ مِتِلْ الِبْسَيْنْ عَيِّطِيلُو بْيِجِي..
عزيزة
هَيْهَاتْ عَ إِيَّامْ زَمَانْ .. كِنَّا نْحِطّْ مِصْرِيَّات الحِلاَّبْ قِدَّامْ الْبَابْ .. وكِنَّا نِشْتِرِي الْجَرِيدِه وْنِشْلَحْ حَقَّا عَ بَابْ المكتبة.. وْهَلَّقْ كِلْ شِي تْغَيَّرْ ..
صِرْتْ إِنْتْ وْنَايِمْ عَم يِسِرْقُوا أَنْفَاسَكْ..
نجيبة
مِينْ عَمْ يِعْمِلْ فِينَا هَيْكْ؟
"يدخل راجي"
راجي
دُود الْخَلّْ مِنُّو وْفِيهْ.. يَا جَمَاعَه وْلاَدْنَا فِيهُنْ الْبَرْكِه..
طنوس
لا تْوَطِّي حَيْطْنَا قِدَّامِ النّاسْ.. نِحْنَا أَحْسَنْ جَالْيِه..
راجي
فِكَّرْتْ النَّعَامِه وَحْدَا بِتْحِبّ تْغَطِّي رَاسَا بِالرَّمِلْ ..
تَارِي فِي نَعَامَاتْ كْتِيرْ..
غَطُّوا رَاسْكُنْ بِالرَّمِلْ بَرْكِي بْيِخْنِقْكُنْ..
وْمَا بِتْعُودُوا تْشُوفوا بِالْمَرَّه.
عزيزة
قَدِّمْ عَ الإِنْتِخَابَات يَا رَاجي..
وْحَقّْ مَار مَانُوسْ حَدْشِيتْ بْتِرْبَحْ..
طنوس
أَنَا ما بِنْتِخْبُو .. حَكْيُوا بِيفَزِّعْ.. بَدِّي رُوح عَ الْحِمَّامْ..
راجي
كْتِيرْ نَاسْ عَمْ يِفْزَعُوا مْنِ الْحَقِيقَه..
بَسّ ما بيرُوحوا عَ الْحِمَّامْ..
"يغني على لحن ع الندّا"
ـ1ـ
عَ النَّدَّا النَّدّا النَّدَّا
مَا عَادْ حَدَا يِتْهَدَّى
هَلِّلي عَمْ يِنْكُرْ سِتُّو
مَرْتُو عَمْ تِنْكُرْ جِدَّا
ـ2ـ
يا شَعْبِي اللِّي كِنْتِ كْبِيرْ
وْمَاشِي بْهَالْكَوْن مْشَاوِيرْ
بِلَّشْت تْعِيش التِّعْتِيرْ
شُوفْ بْلادَكْ شُو بَدَّا
ـ3ـ
جَايِي عَ الْغِرْبِه تَا تْعِيِش
جْدُودَكْ بِالأَصْل دْرَاوِيشْ
جِسْمَكْ مَا بْيِلْبَقْلُو الرِّيشْ
جِلْدَكْ بِالْغُرْبِه صَدَّى
**
المشهد الثاني
"تدخل سعدى وهي تزغرد"
سعدى
لي لي لي.. بَعِدْ سَاعِتَيْنْ.. خَيِّي رَاجِعْ مِنْ لُبْنَانْ.. وِاللِّي بِيحِبّو لاَزِمْ يِسْتَقِبْلُو عَ الْمَطَارْ..
طنوس
كِلّ سِكَّانْ الشَّارِعْ بِيحِبُّوا خَيِّكْ..
بَدِّكْ يَاهُنْ يِنِزْلُوا عَ الْمَطَارْ؟
سعدى
اللّي ما بْيِنْزِلْ حْسَابُو كْبِيرْ عِنَّا..
نِحْنَا مَا قِصَّرْنَا مَعْ حَدَا أَبَداً..
طنوس
يَا إِخْتِي عِنْدِكْ أَلْفْ نَسْمِه.. وَيْنْ بَدُّو يْسَاعُنْ الْمَطَارْ؟
سعدى
لَيْشْ مَا حْكِيتْ هَالْحَكِي لِمِّنْ رِجْعِتْ مَرْتَكْ؟
الظَّاهِرْ نْسِيتْ يَا طنوس إِنَّكْ نِزَّلْتْ الطَّبِلْ وِالزَّمِرْ عَ الْمَطَارْ وِاسْتِأْجَرْتْ تْلاَتْ بْوَاسِطْ.. عِلَّقْتْ الْعَلَمْ اللُّبْنَانِي عْلَيْهُنْ .. وْخُودْ عَ تِزْمِيرْ وْتِطْبِيلْ كِلّ الطَّرِيقْ..
طنوس
كِنْتْ زِعْلاَنْ أَنَا وْمَرْتِي وْحِبَّيْتْ رَاضِيهَا..
سعدى
تَا تْرَاضِيهَا بْتِزْعُجْ الدِّنِي.. لَيْشْ ضَلّْ حَدَا مَا بَزَّقْ عْلَيْنَا؟
راجي
يَوْمِتْهَا عَ الْمَطَارْ .. صَارْ اللي مَا صَارْ.. كَانِتْ جَايِي طِيَّارَه لِلْمِيدِلْ إِيسْتْ.. وَهْجُومْ يَا إخْوَانْ.. تَا نِرْفَعْ إِسِمْ لُبْنَانْ.. أَكْتَرْ مِنْ عِشْرِينْ أَلْفْ نَسْمِه كَانُوا عَ مَطَارْ سِيدْنِي.. لا الِمْسَافْرِينْ قِدْرُوا يِطْلَعُوا.. وْلا الْبُولِيسْ قِدِرْ يِفْتَحْ الطَّرِيقْ تَا يْطَلِّعُنْ.. شِي بِيجَرِّصْ..
أم يوسف
واللـه مَعَكْ حَقّ شِي بِيجَرِّصْ.. أَيْمَتَى بَدْنَا نْصِيرْ عَالَـمْ؟
سعدى
صِيرُوا عَالَـم بَعِدْ مَا يِجِي خَيِّي.. وْلا تِجِبْرونِي إِسْتَأْجِرْ بْوَاسِطْ.. كِلّ وَاحِدْ يِنْزِلْ بْسِيَّارْتُو..
راجي
تَا نْقُولْ عِنْدِكْ مِيةْ سِيَّارَه بِالشَّارِعْ..
وْكِلْ سِيَّارَه بَدَّا تِدْفَعْ بِالْبَرْكينغ خَمِسْ دُولاراتْ بَسّْ..
هَيْدِي 500 دُولاَر ..
شُو رَأْيِكْ نْلِمَّا مِنْ بَعِضْنَا وْنِعْمِلُّو حَفْلِة إِسْتِقْبَالْ بْنِصْ دِينْ الشَّارِعْ.. طَبْخْ وْنَفِخْ وْفِرْقِةْ مُوسِيقَى..
سعدى
وْبْيِجِي مْنِ الْمَطَارْ مِتْلِ الْمَقْطُوعْ .. بَاطِلْ.. لَوْ فِيكُنْ شَرَفْ بْتِعِمْلُولو التّنَيْنْ سَوَا.. الحفلِه وِالإِسْتِقْبَالْ..
راجي
نَقِّي .. يَا الْحَفْلِه .. يَا الإِسْتِقْبَالْ..
يَا عَمِّي عَمْ يِضْحَكُوا عْلَيْنَا النَّاسْ.. لاَزِمْ نِتْعَلَّمْ مِنْ غَلَطْنَا وْنِتْصَرَّفْ صَحّْ..
سعدى
مُشْ رَحْ إِرْضَى.. خَيِّي قِيمْتُو كْبِيرِه..
لازِمْ يِطْلَعْلُو عِزّ عَ الْمَطَارْ..
راجي
أَنَا لْقِيتْ الْحَلّ .. مِنْأَلِّفْ وَفِدْ مْنِ تْلاتْ أَشْخَاصْ.. بِيمَثِّلْ شَارِع اللّبْنَانِيّينْ.. مِنْرُوحْ مْنِسْتَقِبْلُو وْمْنِعْمِلُّو حَفْلِه عَ شَرَفُو..
سعدى
خَلِّيهُنْ خَمِسْ أَشْخَاصْ..
راجي
تْلاَتِه بَسّ.. وِبْفَرْدْ سِيَّارَه..
سعدى
طَيِّبْ أَرْبَعْ أَشْخَاصْ.. وَلَوْ مَا لِي إِكْرَامِيِّه عِنْدَكْ..
راجي
تْلاَتِه .. يِعْنِي تْلاَتِه.. أَوْ بَدِّكْ تْرُوحِي تِسْتَقِبْلِيه وَحْدِكْ..
سعدى
خُودْ وِعْطِي مَعِي شْوَيْ .. شُو نْسِيتْ إِنُّو خَيّي صَاحْبَكْ؟
راجي
خَيِّكْ عَ الرَّاسْ وِالْعَيْنْ.. بَسّ إِسِمْنَا وْكَرَامِتْنَا وْسِمْعِتْنَا وَيْنْ بِتْرُوحِي فِيهُنْ؟
إِنْتِي خَلِّيكِي هَوْنْ وْنِحْنَا مِنْرُوحْ عَ الْمَطَارْ..
سعدى
بَدِّي رُوحْ إِسْتَقْبِلْ خَيِّي.. مُشْ عَمْ تِفْهَمُوا؟
راجي
سَاعْدِي النِّسْوَانْ بْتِحْضِيرْ الْحَفْلِه..
وْلا تِنْسِي التَّبُّولِه وِالْكِبِّه النَّيِّه..
سعدى
يَا راجي سْمَعْنِي شْوَيْ.. خَلّينا نِتْفَاهَمْ.. رْجَاع لْهَونْ .. هَيْئتو رَاح.. الْعَمَى إِذَا تَيّسُوا الرّجَالْ.. تَا رُوحْ بَلِّشْ بِالتَّبُّولِه وْبِالْكِبِّه النَّيِّه.. مْأَكَّدْ بِيكُونْ جُوعَانْ خَيّي..

**

اقلب الصفحة من فضلك